കൊല്ലത്ത് 56-കാരിയെ വായിൽ തുണി കുത്തിത്തിരുകി പീഡിപ്പിക്കാൻ ശ്രമിച്ചയാൾ പോലീസ് പിടിയിൽ

ചിതറ: കാഞ്ഞിരത്തുംമൂട് പെരിങ്ങാട് സ്വദേശിയായ 47-കാരനായ അനിൽകുമാറിനെ 56 വയസ്സുള്ള വീട്ടമ്മയെ പീഡിപ്പിക്കാൻ ശ്രമിച്ച കേസിൽ ചിതറ പോലീസ് അറസ്റ്റ് ചെയ്തു.

ഇന്നലെ വൈകിട്ട് അഞ്ച് മണിയോടെ, പെരിങ്ങാട്ടിൽ ഒറ്റയ്ക്ക് താമസിക്കുന്ന വീട്ടമ്മ കുളി കഴിഞ്ഞ് വീട്ടിനുള്ളിലേക്ക് കയറിയപ്പോൾ, വീട്ടിൽ ഒളിച്ചിരുന്ന അനിൽകുമാർ ഇവരെ കടന്നുപിടിക്കുകയും വായിൽ തുണി കുത്തിത്തിരുകി പീഡിപ്പിക്കാൻ ശ്രമിക്കുകയും ചെയ്തു. പീഡന വിവരം പുറത്തുപറഞ്ഞാൽ കെട്ടിത്തൂക്കി കൊല്ലുമെന്ന് ഭീഷണിപ്പെടുത്തുകയും ചെയ്തു.

വീട്ടമ്മയുടെ ഉച്ചത്തിലുള്ള നിലവിളി കേട്ട് അയൽവാസികൾ ഓടിയെത്തിയതോടെ അനിൽകുമാർ സ്ഥലംവിട്ടു. വീട്ടമ്മയെ കടയ്ക്കൽ താലൂക്ക് ആശുപത്രിയിൽ പ്രവേശിപ്പിച്ച് ചികിത്സ നൽകി. വീട്ടമ്മയുടെ മൊഴി രേഖപ്പെടുത്തിയ പോലീസ് കേസ് രജിസ്റ്റർ ചെയ്തു.

ഒളിവിൽ കഴിഞ്ഞിരുന്ന അനിൽകുമാറിനെ ഉച്ചയ്ക്ക് മൂന്ന് മണിയോടെ ചിതറ എസ്.ഐ. സാജന്റെ നേതൃത്വത്തിലുള്ള പോലീസ് സംഘം മടത്തറ ഭാഗത്ത് നിന്ന് അറസ്റ്റ് ചെയ്തു.